Editorial

Chin Hlang kah aphu ka sang koek “Chin Hlangphun Kho hnin:-Hlangtom loh mah kah hlangphun a phuet nah Cil Olthang boeih a khueh uh. Amah te van bang la (20th) February kho hnin he Chin Hlangphun ham a phu a ka tlo koek la ngkhueh uh khohnin sang koek la om.

February (20th) hnin (Chin Hlangphun khohnin) he, lai so ah Chin Hlangphun na tah Laihman ah hlangphun pakhat la ngom u van ti he a ka ming pui kung la om.Tahe ah Chin Hlangphun khat la a pai nah a kha (72) na la om coeng. A konghu he koep thuep mai koi nih rhai nah moeh ntawng u tue khaw moeh om. Hlangphun la a ming a tho na tue khaw yoei pueng.

A cuek ah Chin ram khohnin lam ni a ming a na sui uh. 2010 kum lam ka loh Barhan kah khosak rhamsak nah a tho vael phoei daengah CNF neh Barhan Olkam nah a cak phoei ah, 2013 kum lam ka loh February 20 hnin he Chin Hlangphun khohnin (Chin National Day) la a hno na cuek la om.Chin Hlang na he yan ah mah kah Lo,Im a ka khueh hlang phun la ngom. Mah ngaih tui hoi, Rhasak tih Lo ntawn tih kho a ka sa hlang la ngom.

Bungpui khut na ben ah mah mah kah kut kho a ka uep nah hlang boeih ni. A hnuk ah tah Colony Mirang (English) mawt na hmui ah vik ngom. Hlangkah kut hmui ah om te patang aih tila Boyok Aung San loh a ti dong ah, Kachin, Shan, Mol tlang ah kho a kasas rhoek mia mana neh cut u thae tih Mirang (English) kut hmui lam ka loh nloeih u thai.

Te phoei ah tah mah poek ngaih ah khosak thai nah ngkhueh thai. 1947 February 12 hnin ah Shan ram, Pinlong ah Chin Hlangphun na tah Boyok Aung San neh hmaih ah Chin, Shan hlang phun na neh mah poek ah khosak thai nah kopoek thik at la om thai naham Pinlong Olkam nah ca neh Olkam nah a na sai uh. Tedong ah te kah khohnin te, (Myanmar National Day) Kolram hlangphun kho hnin la pa hoi a na cak sak uh.

Tlang so kah a ka om Maya mana boeih loh ka ko vai uh tina la ming rhip a thut u tih a pa bae 1948 kum February hla a pha vaeng ah tah, Chin Hlangphun kah cil Ol tah tholaeng nah koep om hang. Chin State Falam kho ah February 19th, hnin ah kho ta kuem kah laipai hlang (5000) rhoek loh mah poek ah khosak thai nah Democracy la a hoi u tih, Chin ram kah khosak nah a thai la koep tong u hang. 1950 kum October (9) khohnin ah a sai Chin ram han khosak cil a ka thui Council tah lamhma cuek kah ngol tun nah Oltloek na te a cak sak u tih February 20th kho hnin te, Chin Hlangphun khohnin la a na hmoel u tih a na cak sak uh.

1951 kum a tong cuek nah February 20th khohnin he Chin ram khui, Mindat kho ah a na tong cuek la om. Tavaengah U Nuh a mah loh Ol uen thapaek na neh olthui nah a khueh pah. So kah ol bang la Chin Hlangphun kho hnin a phuet thai na ham yan vaeng kah Nupa na loh khodaeng lungma moeh a na ueh phoei lam ka loh dang thai la om. Tedong ah a ka khum tang tae Nupa rhoek te hin yah na u sih.Mah singyoe phunglam khaw hma sak pawt ham khoem bael u sih.

Be the first to comment on "Editorial"

Leave a comment

Your email address will not be published.