HLANG BOM KE YOE PAWH

Yan ah hlang pakhat loh ayu a loh tih aca tungpa panit a cun, ti. Nikhat hnin atah acapa anoe loh anapa nala “Apa, ka cadong coeng, ka pang hamkoi rho n’pae,” atinah. Tevaengah anapa loh tangka pe (25) a paek. Tephoeiah cadongpa te khotloe lah vil cet tih kho pakhat ah koe a pha. Aphanah ah a pahnah imm a ming pawt dongah long taengah hlangduek up ham khuehnah rhokkhoem imm khui ah lom kun tih thokaeng bantang ben ah ngam doe ah ip. Tekah imm khui ah te hlang rhok vuei ham pakhat te carhong lungkil ah a khueh uh te a hmuh.

Tetla ngam tih a ih vaengah cadongpa loh hula neh hlang tungpa patong te a hmuh tih hlawt hinghang. Te vaengah aleng lamkah dingca/damyah panit imm khui la hakun rhoi tih a khui kah hnopai huen ham hlangduek thingkong te a kuel rhoi. Amih rhoi loh a kuel te cadong pa loh a hmuh tih, “Hey, tekah thingkong te kuel rhoi boeh,” atinah tih amah kah tangka a kaelhduen, aka om carhui pe (25) te boeih a paek rhoi tih dingca rhoi loh a caeh tak rhoi.

Tekah cadongpa te tekah imm lamloh koe cet. Longpueng a caeli vaengah a bung pong tih longtaeng ah sut ngol. Te vaengah poek mueh ka mikhaptok ah ataeng lah lumuek aka muek, angki dung aka puei, sungsa aka vah tungpa pakhat te pakcak a pai pah. Anih loh cakkoi cina te mikhaptok ah a vival vival a sai patih a caaksak.

Telam longte anih loh phat a caeh puei. Acaeh rhoili vaeng longpuei ah huta hamca pakhat a kho tlo tih sut a ngol te a hmuh rhoi. Te vaengah cadongpa aka caehpuei hlang long te amah sungsa khui kah tuitang te dak a poh phoei ah tuisi te akut ah a cipsak tih hamca kah a kho te a yuh pah. Hamca te pahoi tho tih lam. Tedongah hamca loh tekah hlang te akhueh duen ol hnatuennah saki pakhat a paek.

Te lamkaloh cadongpa te phat a hui tih tlang som lungto so ko lah a caehpuei. Hmuen khat koe a pha rhoi vaengah lungto soah va abok pakhat a duek te cadongpa aka hui long te lawt a hmuh tih va kah aphae te hlawt a bit tih sungsa khui ah lom a sang.

Te lamkaloh phat cet rhoi tih siangpahrang impuei te koe apha rhoi. Te vaeng rhuet ah te siangpahrang canu loh va na hamla cadong a tlapli. Cadong a tlap vaengah ol lungthum a dawt tih phek athuem la aka thui thai te vanah ham ol a hoe. Tekah oldawt te athuem la phek a thui thai pawt atah pahoi a ngawn.

Tetla a om dongah hula te a ngaih van dae oldawt ka lan thai mah pawh tite a ming tih ihmueh ihnai la kho khing a poek. Te vaengah anih aka hui mawt hlang pa te pakcak ha cuk pa tih cadongpa te hula oldawtnah ah caeh ham tha a paek. Ti atah cadongpa khaw hula kah noemcai oldawtnah lah caeh ham hlah u van. Tetlam te oldawt hamla a om coeng dongah ba ol lae a dawt eh tite ming a ngaih tih cadongpa aka hui hlang te hula kah a hnuk hnuk ah mikkhah mueh la a caeh caehnah ah ming mueh la duem a dawn.

Hula nu longkhaw cadongpa te oldawt ham a om coeng dongah anih poeknah aka pae rhaipa taeng lah cet tih poeknah a bih. Rhaipa loh amah hulanu kah khokom te dawt ham a thui pah. Te vaengah hula hnuk aka vai hlang long te a hlaa lamkaloh cuek kah saki nen te ol duem a hnatuen tih a yaak bangla cadongpa taengah a thui pah.

Avuen mincang koe a pha atah cadongpa te hula kah noemcai hamla cet. Hula te lawt a hmuh vaengah hnuk vaeng rhokkhoem imm khui ah amang ah a man hula nu tite akaa neh hlang yaak ah a thui. Phoei atah hula loh cadongpa te ol koe a dawt. “Tahae ah a balae kai loh dawt ham ka cai tite thui lah a tinah. Cadongpa loh thui khoe lalahla sa utih hula loh, na thui khoe coeng, cet laeh a tinah tih ahnukvai rhoek la khuen ulaeh a tinah vaengah akut dongkah khokhom khovang acun doe ah phawn a voeih paphai. Hula loh koe a sawt tih amah khokhom khovang neh koe a nueh vaengah phek vai uh tih cadongpa te atang a paek. Cadongpa  omngaih canghloengca la imm la mael.

Avuen ah dawt ham a om bal dongah cadongpa aka hui hlang long te hula a caeh caehnah ah koep a dawn bal. Kho koe a yin nen tah hula te a phae a buen tih a tloe lah a ding te tekah hlang loh a hmuh tih hlavai kah cadongpa neh a caeh rhoi vaengkah lungto soah va bok kah aphae a loh te sungsa khui kah dak a muk tih aphae la koe a buen phoeiah hula hnuk ah phat ding van. Hula neh rhaipa a hum uh rhoi te a hmuh tih ol a thui rhoi te a hla lamloh saki neh koep a hnatuen bal tih koep ha mael.

Avuen mincang koe a pha bal vaeng atah hula loh cadongpa te ol a dawt bal coeng. “Tahae ah abalae kai loh dawt ham ka poek,” a tinah. Cadongpa loh hula kah samkaep te a tueng tih oldawtnah te phek a thui thai bal. Thangvuen atah a hnuk khit oldawtnah om pawn ni. Tedongah cadongpa khaw, hula khaw lungbuei tluep tluep tuen, tlai rhoi.

Khoyin koe a pha atah hula te rhaipa taeng ah koe cet bal. Te vaengah cadongpa kah hlang long te ahnuk hnuk ah a vai bal tih a dawn. Ol a thui rhoi te ahla lamkah saki neh duem a hnatuen. Rhaipa loh arhai bik, ulongkhaw a sai thai pawh, a ming pawh kaikah ka lu he dawt a tinah tih a tueih. Hula te voelh a caeh phoeiah paek kah hlang longte vainam tumca sen neh rhaipa kah alu te phawt a tloek tih sungkoi khui ah duem a sang.

Avuen mincang hula loh cadongpa oldawt ham atue pha bal vaeng atah hula nu te bahoeng omngaih. Batih ti atah a dawt ham koi rhai kah lu te along khaw lo thai mah pawh tila a poek dongah ni. Ol koe dawt vaeng tah cadongpa te thui ham ming voel pawt tih sut om. Te vaengah cadongpa aka hui hlang te pakcak ha thoeng tih cadongpa te ahnuk ben kah kut ah rhaipa lu te duem a paek.  Cadongpa te oldawt phi thai voel pawh titih mael laeh a tinah vaengah akut dongkah sungkoi te carhong dong lah vul a voeih thuk. Tete koe a sawt uh vaeng atah oldawtnah bangla rhaipa lu la om tih hula nu neh tekah hlang boeih te kopoekrhai na neh bae uh tih cadongpa neh siangpahrang canu te yuva halam om coeng.

Te vaengah cadongpa aka hui hlang te ka mael pawn ni titih hlahnah olthui neh kut atuuk rhoi. Tetla ati vaengah cadongpa neh hula loh kaimih rhoi kuttuuk yuluei poei ah om van dae saw tila a hloh rhoi hatah, “Kai tah nangmih taengah ka ngolpai thai voel moenih,” a tinah. Tih, cadongpa loh nang he ulae tila a dawt vaengah, “Kai tah hlangduek thingkong khui kah hlang, dingca rhoi loh kaikah thingkong ka ong eh ati vaengah nang loh tangka pe (25) na paek tih kaikah thingkong ong mueh la a caeh taak rhoi te ta,” a tinah tih te vaeng daengah cadongpa loh anih te amah loh a bom hlangduek tila a ming. Te phoei atah nawmca la yuva rhoi tih kho a sak rhoi, ti.

Hekah yancil khui ah cadongpa loh hlangduek thingkong khui kah te tangka pe (25) neh abom bangla hlangduekpa longkhaw cadongpa te rhainah atong vaengah koep a bom van. Hlang bom ke yoe pawh. Mingham: Hekah cil he aka om tangtae cil la om tih cathut kung loh yakming then neh atoica la pawl tael la om. Sen aih tih alung ko kah a ngen caehtaak la om tite awtawd ming ham ka tueng sak.

Ollung:Dingca = damyah,Vainam = tumca sen,Khovang = khokhom khat ben bueng,Rhokkhoem imm = funeral home,Vival = kilkalca khui ah, aloe lah,Mikhaptok = mik khah na rhuet ah,ihmueh ihnai = ih mueh la khoyin khing om, CREDIT: SALAI SAN AUNG

Be the first to comment on "HLANG BOM KE YOE PAWH"

Leave a comment

Your email address will not be published.